नेकपा (माओवादीं) नेपालगञ्ज नगरपालिका भवनय् आइतबाः सुथय् निगू शक्तिशाली विष्फोट यानाः भवन स्यंका ब्युगु दु।
नगर निर्वाचन स्यंकेत उम्मेदवार व कर्मचारीतयत भौतिक कारबाही यायेगु धम्की बीधुंकूपिं माओवादीतयसं युद्धविराम भंग यायेधुंकाः नगरपालिकाय् आक्रमण याःगु थ्व न्हापांगु खुसि खः।
बम मुइधुंकाः वःगु सःनापं विपी चोकय् दुपिं सुरक्षाकःमितयसं अन्धाधुन्ध गोली कयेकूबलय् अछामी पार्वती गेष्ट हाउसया झ्याःया न्ह्याकनय् नापं गोली लाःगु दु।
पश्चिम पृतना राँझां वःगु शाही नेपाली सेनाया डिस्पोजर पुचलं मेमेगु बम निष्क्रिय याःगु खः।
नेपालगञ्ज नगरपालिका भवन ध्वस्त
राप्रपां मन्त्रीपिन्त कारबाही याइगु
राप्रपां मन्त्रीपिन्त कारबाही याइगु
राप्रपाया संस्थापन पक्षं खुम्ह मन्त्री, नकतिनिअपदस्थ उपाध्यक्ष पदमसुन्दर लावतीनापं विशेष महाधिवेशन यायेत सनाजुपिं १० म्ह केन्द्रीय दुजतयत पार्टीया साधारण दुजःतक नं मदइकथं चीकाछ्वइगु जूगु दु।
निष्कासनया धलखय् शाही मन्त्रीत कमल थापा, भुवन पाठक, रोशन कार्की, तोरणबहादुर गुरुङ्ग, प्रतापराम लोहार व बृजेशकुमार गुप्ताका नापं विशेष महाधिवेशन यायेत सनाजूपिं उपाध्यक्ष लावती, जगत गौचन, राजीव पराजुली र दुर्गा श्रेष्ठ दु।
उमित सोमवाः पत्रकार सम्मेलनयानाः पार्टीया साधारण सदस्यतापाखेँ चीकागु जानकारी सार्वजनिक याइगु जूगु दु।
असन्तुष्ट पक्षतयसं धाःसा पुस २६ व २७ गते विशेष महाधिवेशन यानाः अध्यक्ष पशुपति शमशेर राणायात चीकिगु जूगु दु।
पोखराय् माअोवादी ज्वन
युध्दविराम भङ्ग जुइधुंकाः न्हिन्हि धैथें बम मुयाच्वंगु पोखराय् आइतवाः धाःसा बम मुइकेगु कूतः सफल जुइमफुत। चिप्लेढुङ्गाया तरकारी बजारनापसं छगः शक्तिशाली बमयात सुरक्षा फौजं निष्क्रिय याःगु खः।
अथेहे सुरक्षा फौजं पृथ्वीचोकं आइतबाः सुथय् छम्ह माओवादी नेतायात हतियारसहित ज्वंगु दु।
पृथ्वीचोकया होटल अशोकं ट्याक्सी गयाः बिस्युवनेत्यंम्ह माओवादी नेतायात सुरक्षाफौजं घेरा तयाः ज्वंगु खः।
ज्वंम्ह माअोवादी गोर्खा जिल्ला घ्याल्चौक निवासी २२ वर्षीय प्लाटुन सहायक कमाण्डर व अनेरास्ववियू (क्रान्तिकारी) कास्की जिल्ला कमिटीया उपाध्यक्ष जूगु सीदूगु दु।
आः नेवाः पोस्ट डट कम जक नं
नेपालभाषाया न्हापांगु वेब म्यागेजिन नेवाः पोस्ट सुरु निसें हे np डोमेनय् newapost.com.np न्ह्याकाच्वनागु खः। थ्वहे झ्वलय् इस्वी संवतया न्हूदँ २००६ निसेँ newapost.com दर्ता यानातःम्ह मनूनं उगु डोमेन झीगु वेबसाइटय् फरवार्ड यायेत राजी जूगु दु। उकिं आः www.newapost.com जक टाइप याःसां थ्व वेबसाइट स्वयेफइ। 5 January 2006
शान्ति सुरक्षा कमजोर जूगु जाहेरी
देशय् शान्ति सुरक्षाया अवस्था बांलानावनाच्वंगु खँ कनाच्वंम्ह जुजुयात ताप्लेजुङया जनतां अःख विचाः जुजुयात कंगु दु। ताप्लेजुङ जिल्लाया भ्रमण धुंकाः पाँचथरय् राजदम्पती नापं प्रत्यक्ष खँ ल्हासेँ अनया जनतां शान्तिया माग याःगु खः। जुजु धाःसा शान्ति स्थापनाया निंतिं शान्तिवार्ताया पलेसा निर्वाचनया लँपुइ वनाच्वंगु दु। 5 January 2006
स्वंगु वाणिज्य बैंकया वित्तीय स्थिति नाजुक
देया स्वंगु तःधंगु वाणिज्य बैंकया वित्तीय स्थिति नाजुक जूगु निश्कर्ष केन्द्रीय बैंक नेपाल राष्ट्र बैंकं पिकाःगु दु। वित्तीय स्थिति कमजोर जूगु बैंकयात कारबाही यायेगु केन्द्रीय बैंकया नीति दुसां राष्ट्र बैंकया सञ्चालक समितिं निम्ह मन्त्रीया दबाबया हुनिं कारबाही यायेमफयाच्वंगु सूत्रं धाःगु दु। व्यापारिक घराना एनबी ग्रुपया संलग्नता दुगु निगू तःधंगु वाणिज्य बैंक नेपाल बंगलादेश बैंक लिमिटेड व नेपाल क्रेडिट एन्ड कमर्स बैंक लिमिटेडयात कारबाही मयायेत अर्थ राज्यमन्त्री रुपज्योति व उद्योग वाणिज्य व आपूर्ति सहायक मन्त्री राजेशकाजी श्रेष्ठं दबाब बियाच्वंगु सूत्रं धाःगु दु। थुपिं निगू बैंक बाहेक लुम्बिनी बैंकया वित्तीय स्थिति नं नाजुक खनेदु। कारबाही प्रक्रिया अवरुध्द यायेत राष्ट्र बैंक सञ्चालक समितिया दुजः व व्यापारी प्रदीप कुमार श्रेष्ठं नं भूमिका म्हिताच्वंगु सी दुगु दु। कारबाहीया प्रस्ताव थौं बिहीवाः च्वनेत्यंगु राष्ट्र बैंक सञ्चालक समितिया बैठकय् हाकनं पेश जुइत्यंगु दु। 5 January 2006
प्रेस दमनय् नेपाल नम्बर एक
सन् २००५ या हलिंन्यंकंया सञ्चार स्थिति प्रतिवेदनय् प्रेसयात दमन याइगु देतयगु लिस्टय् नेपाल नम्बर एकय् लाःगु दु। रिपोर्टर्स विदआउट बोर्डर्सं जारी याःगु प्रतिवेदन कथं सन् २००५ य् हलिंन्यंकं प्रेस हस्तक्षेपया १ हजार ६ सय घटना मध्ये बच्छि घटना अर्थात् ५६७ घटना नेपालय् जक जूगु दु। 5 January 2006
प्रजातान्त्रिक काँग्रेसया महाधिवेशन थनिनिसेँ
पुलांम्ह प्रधानमन्त्री शेरबहादुर देउवायात निर्विरोध सभापति ल्ययेत तयार जुइधुंकूगु नेपाली काँग्रेस प्रजातान्त्रिकया महाधिवेशन थौं बिहीवाःनिसेँ येँय् न्ह्यायेत्यंगु दु। नेपाली काँग्रेसपाखेँ तज्यानाः तयार जूगु थ्व पार्टीया न्हापांगु अधिवेशन जुसां उमिसं थःगु महाधिवेशनयात ११ गू महाधिवेशन धकाः धयातःगु दु। बिहीवाः न्हिनसिया एक बजे न्हू बानेश्वरया लोकतान्त्रिक चोकय् महाधिवेशनया अौपचारिक उदघाटन जुइगु ज्याझ्वः दु। उदघाटन सुनां याइ धकाः स्पष्ट मजूनि। तर कृष्णप्रसाद भट्टराईयात उदघाटन याकेगु कुतः जुयाच्वंगु दु। 5 January 2006
